وصفة لتقوية الشعر و منع تساقطه و مجربة ( والله على ما أقول شهيد )

بسم الله الرحمان الرحيم 

 

 

بلا منطول عليكم أو نشكر فالوصفة ديالي  نتوما جربوها و ردو عليا ولكن الله يخليكم ماشي تجربوها مرة وحدة أو 2 و تقولو شعري ماقواش ولكن التساقط من أول مرة غادي تلاحظو أنه قلال انشاء الله و التقوية مع المدة شهر هاكاك انشاء الله يبان المفعول 

 

المهم غادي تحتاجو :

 بصلة واحدة ( البصلة الحمرا ) 

 

أربع ثومات 

 

زيت الزنجلان , زيت الكوك , زيت الصبار , زيت الخروع  و تقدري تزيدي أي زيت كيجي مع شعرك 

 

2 ملاعق كبار خل التفاح 

 

نص ملعقة صغيرة ملح 

 

الطريقة :

 

نقي البصلة و قطعيها على 2 و ديريها تبخر مع ثومة وحدة حتى هي منقية و مرة مرة تقبيها بموس ( البصلة )  من بعد ملي تحسي بيهم تبخرو مزيان خليهم يبردو شوية 

و ديريهم فالخلاط و طحنيهم و زيدي ملعقة أو 2 أو 3 أو ... شحال مابغيتي ديال الزيوت ( تكون الزيوت مخلطة و خودي منها ملعقة أو القياس اللي بغيتي و يناسب طول شعرك ) و زيدي 2 ملعقات خل التفاح و نص ملعقة صغيرة ديال الملح ضربيهم مزيان فالخلاط حتى يوليو كيف شي عصير خاتر و ديريه لشعرك لمدة ماتفوتش ساعة و الى بغيتي تخليه أكثر ماديريش الملح و ديري غير ملعقة ديال الخل و كثريالزيوت و ديري بوني أو بلاستيك من بعد غسلي شعرك و نصيحة سمعتها من واحد الدكتورة ملي تكوني تغسلي شعرك ماتمشطيهش و حاولي عليه باش مايطيحش و تقدري ملي ديري البلسم تمشطيه ولكن بشوية و تكون المشطة سنانها كبار و واسعين و ملي تخرجي من الحمام ماتمشطيهش فازك خلي حتى ينشف و ديري ليه شوية الزيت و مشطيه بشوية و انشاء اللهمايبقاش يطيح و يقوى و انشاء الله نكون فدتكم بهاد الوصفة 

 

ملاحظة :

 

هاد الوصفة كتناسب حتى الشعر المقصف 

 

ماتنساونيش غير بدعوة الخير و  تيسير الأمور 

منقول

تصنيف : شؤون ادم وحواء